RUMAH BATU DI TENGAH TEMUDA

[seliong ak wau]

RUMAH BATU DI TENGAH TEMUDA

Jako kena bekelala

Enti nuan bejalai ke Bukit Kapar (pansa enti nuan ke Kuala Selangor ari Klang), dia nuan meda tanda papan besai: “TANAH TAPAK RUMAH DIJUAL.” Tu ku bengkah tanah dia:

1. Setapak 40’ x 40’: RM20,000

2. Binaan rumah 1 tingkat: RM80,000 (tanah dan binaan)

Tanda tu terus pansut aba Bertia Harian enggau Utusan. Mayuh urang besebut ke iya, aku terus ngabas kin. Jauh tama ke kawasan temuda kin. Nadai getah, nadai sawit, tang bisi urang udah mula niri ke rumah dia. Ari nya ditanya aku mimit jalai sida nyual tanah.

1. Tanah besai, siti geran. Enti deka berumah dia, sain enggau urang ke empu tanah. Nyadi sapa sapa empu tanah enggau rumah dia, masuk Association tu, lalu bisi hak megai reta nya.

2. Tanah enda ulih di cagar asuh bank, laban bepuluh iko nama urang empu. Tang enti ka financing ngaga rumah, contractor ulih ngaga dulu, lalu bayar ansuran asuh sida iya. Contractor nya urang ke empu tanah.

3. Ko contractor/urang empu tanah: “Aku nulung urang empu rumah. Untung sigi nadai mayuh tang meda mata urang ke bisi tanah, bisi rumah, ati aku senang.”

4. Kati ko baka letrik enggau ai? Nya nadai hal, laban urang ke empu tanah nya udah masang paip enggau letrik ari “main.” Nadai nyadi masalah.

Kitai Sarawak

Meda gaya urang ditu ngadu ke rumah, aku ingat ke kitai rumah panjai. Sebilik bisi 3, 4, 5 iko anak kereja di Semenanjung ditu. (Laban nadai kereja di Sarawak, lalu enda ulih kereja perintah). Enti sida iya deka penchen, sida iya tentu enggai diau di Semenanjung. Tentu sida deka pulai ke menua diri empu. Dini endor berumah?

• Kesatu, enti meli di Kuching, di Sibu, di Miri rumah teres setingkat udah RM150,000. Dua tingkat diatu udah RM300,000. Ni gaji kereja kilang tulih ke rega nya?

• Kedua, agi ga jauh ari apai indai, kaban belayan. Tu udah bepechah ga ari pengidup bansa Iban.

• Ketiga, ari ke dikelai ari keudah, sida tu mayuh ngentak belakang rumah. Bisi ngentak ujung tanju. Rumah panjai enda manah dipeda agi.

Laban tu ka majak nyadi penusah pegila lusa, kitai diatu patut mikir ke bakani nyedia ke endur diau asuh bansa Iban. Housing problem, ko jaku Inglish apin nyadi endar laban sida ke kereja di Semenanjung diatu agi berumur 30, 40 taun. Mayuh agi sida nya biak ari 30 taun.

Nama utai deka nyadi?

Social problem ko jaku Inglish. Ari housing problem, social problem deka nyadi, tang bansa nya ukai bansa ke dipeda aba news. Urang ke ngempu housing problem nya bansa Iban, bansa kitai.

Bejalai aja nuan ke menua Filipin, peda mensia diau di tempat setingan di kumbai urang slum. Ka meli rumah bepuluh ribu, duit nadai. Bejalai aja nuan ke Jakarta. Tusah nusoi ke kita. Peda aja urang ke diau baruh jambatan, tinduk sebarang endur. Uji tepan Air Asia, meda ke Jakarta kin (tambang pulai mansang mina RM500 enti tumu booking).

Aku enda kala meda di India din tang bala kawan ke nusoi mensia ukai mimit mimit ke tinduk di tisi jalai.

Aku enda kala meda di Kenya, di Nairobi, di Bangkok, di Hong Kong. Cherita kawan ke selalu meda madah ke punusah nadai tumah endor diau.

Setingan Di Kuching

Kitai udah bisi meda titis penusah tu di Kuching. Kemayuh agi bansa kediau di rumah setingan nya bansa kitai Iban. Sida iya kereja kontrak, tang bini anak di bai. Nya anak enda sekula. Pengerai enda tentu ulih jaga laban kawasan setingan. News keluar dibacha kitai madah ke sida tu kemayuh agi bansa Iban. Bansa Iban.

Pengujung penusah tu ila deka pulai asuh kitai bansa. Anak nadai sekula, ekonomi baruh. Ari ekonomi baruh, pengidup enda sama enggau bansa bukai. Penusah tu nyadi besai pegila lusa.

Sapa Ngadu ke Penudah tu?

Enti penusah tu deka disatup enggau mujur pegila lusa, kitai petut mikir ke iya diatu. Anang nganti penusah datai endur kitai beterigau ngiga jalai ngadu ke iya.

Tang diatu kitai besuek suek “Tu ukai pengawa aku” “Tu penusah pesendirian,” “Tu penusah kediri iya empu.”
Nya sigi amat. Sapa ka empu penusah urang bukai?

Ari Pengawa Ke Patut Dipikir

• Kesatu, kitai ke bisi tanah temuda enda jauh ari rumah panjai besedia mitak tanah. Anang ngira ke nadai geran, endang rumah panjai pen nadai geran. Ari tu nuan nulung urang ngentak rumah diri empu, lalu nuan mega meri value tanah nuan.

• Ukur 60’ x 40 ‘ =2,400 kp. Umbas iya pemesai rumah nya. Peda gaya tanah maya nuan nyukat iya. Bisi ke besai agi, tau di jual enggau rega bukai.

• Kos nuan nya ngaga jalai enggau ngerata ke tanah endor berumah. Enti tanah rata, kos nuan enda mayuh. Gaga ke parit ngeling pitak. Angar ke RM40 ribu ambis.

• Rega jual nuan RM15 sekaki pesegi. (2,400 x 8 = RM19,200). Se ikar, ditulak jalai nuan tau ngaga 10 pitak. 10 pitak tu aba perambu aja, tang enti nuan tejual 8 iti, rega tanah enggau rega peluh nuan udah tepulai. Rega tanah nuan udah setanding enggau rega tanah di nengeri.

• Gaga agreement enggau urang ke meli. Enda ibuh di chop, di setem, tang awak ke tuai rumah nyadi saksi.

• Semua urang ngaga rumah, titih ke pelan udah digaga nuan. Anang sebarang ngaga rumah. Gaga ke bisi standard. Rega enda ibuh mar, tang anang ngaga langkau umai dia.

• Enti jalai enda di tar, engkah ke batu aja.

Enti nuan agi bisi tanah ngerimbai nya, dia nuan tau ngaga siti da agi. Untung sigi enda tentu. Enti nuan nemu ngaga rumah, lalu nangkap kontek ngaga rumah, engka nuan bisi untung lebih agi.

Di Semenanjung

Ke udah dipeda mata aku, bansa Melayu ditu ngena chara tu ngaga rumah. Laban mayuh kilang semak Kampung, dia rumah sida iya laku amat. Kampung Subang (semak Bukit Cehaya), Kampung Johan Setia aba Jalai Banting, Kampung Teluk Pengelima Garang enggau di Banting din, jalai ngaga rumah semua nitih ke jalai tu.

1. Tiang konkrit 4'’ x 4’'.
2. Bata pasir, rega RM0.12 siti.
3. Atap semua corrugated sheet.
4. 2 bilik, siti tandas. Rega jual sida ia RM40,000.

Pengujung Jaku

Enti kitai bisi nemu pasal kontrak enggau nyaga duit, tu pengawa ke tau dikereja. Nuan nulung bansa Iban ngembuan rumah. Enda ga bansa kitai nyadi setingan di menua diri empu. Enda ga bansa Iban nyadi kampar di menua Sarawak.

Kedua nuan empu tau nemu (realised) rega tanah nuan. Enda ga tanah nuan temuda aja, enda berega. Ka bumai, nadai ga tulang di anjung. Ka nyagar asuh bank, nadai ga pala. Nya kengka ke bisi EPF, pulai kia. Udah siko nyadi, arap ke sida bukai tau nitih pegila lusa.

Arap ke kitai anang nganti tanah ke bisi pala endur ngaga rumah, sigi enda ulih di anti kitai. Gaga aja pelan baka tu. Arap ke kitai Iban semua nemu nyingkang bisnis, nulung bansa diri. Terima kasih.

MAJU BANSA IBAN.

[apaiDidum]

manah idea tu aya SAW.

Rumah Batu Temuda (RBT) tau dipadahka/diterang kitai ngagai bala tuai-tuai Iban...ngambika sida ia nerangka pemanah RTB tu ngagai nembiak dudi ari, kelebih agi ngagai bala nembiak rebak baru ti tebal agi benung gawa ba nengeri....

kitai tau plan meri motivasi ari diatu ngambika HOMELESS enda nyadi ba bansa kitai. Enti ulih..padahka penerang pemanah ngaga rumah maia umur agi biak. anang udah pencen baru ka meli tauka begagaka rumah.

[seliong ak wau]

Ha..ha Apai Didum, sigi baka iya.
Enti enda pia lalu nadai berumah kitai Iban maya pulai ari Johore, selangor N Sembila ila.
Kedua tu meri kitai bisnis. Enti enda kitai ngadu, sapa agi, enda pia?
Ketiga anang nganti bis pala tanah endor mula ngaga rumah. Rumah panjai kitai diatu pen nadai pala.
Ke empat, kitai bisi puku, (selalu sebana nadai puku), ukai puku kena nyabung/ngirup, tang puku kena bisnis.

Enti ukai kitai, sapa agi?

[apaiDidum]

ngam.
we should start campaign fr nw......ngambika kitai nyau berumah ba tengah madang sawit ila......nemu perintah kasih ke kitai ila, nyau meri pala tanah ga sida....tang kitai mesti meruan ngansak belama........

[RajaUlar]

Manah amat cara berumah baka nya. Tau kitai ngadu ke cara berumah bakatu di Sarawak.


Sapa bisi tanah besai, tisi jalai, enda tentu jauh ari bandar?