Ekonomi Seruran di Rumah Panjai Part 3: Letrik

[seliong ak wau]

Ekonomi Seruran di Rumah Panjai Part 3: Letrik

(Arap ke sara sari tu meri penerang pasal kitai nguna letrik ngiga duit di rumah panjai)

Jaku kena bekelala

Sebana bansa Dayak enda disambung letrik didinga kin kia. Ari tinjau kitai Dayak, perintah bechiping, perintah enda ngibuh ke kitai rumah panjai. Sebana nya engka amat, enda bula, kitai enda nemu lalu enggai enggau urang becharut ke nya. Ari tinjau sida SESCO, mayuh rumah panjai nguna letrik ke pemaduk mimit, enda tepulai ke rega nyambung enggau rega urang macha meta letrik.

Tu endang amat.

Guna Letrik di Rumah Panjai

Agi ke diatu enti bisi letrik, lemai kitai rumah panjai nya betungga ke "sarah bodo". Sarah bodo reti nya TV nya, laban nemu bejaku aja tang enda nemu nyaut enti ditanya. Kedua sida ke indu enti deka berapi enda nusah ke diri meda dapur. Ketiga, idung enda chelum laban lampu kelita. Keempat, sida ke sekula nyamai enda ngaga kereja sekula maya malam, enda baka urang ke dulu dulu nyau bepasang kelampu ges. Kelima, sida ke bulih ngasu enda ibuh bekasam agi, laban bisi peti ais endur nyimpan dagin jani, dagin rusa, ikan enggau dagin jelu bukai.

Bisi ga penaggul nyadi. Mensia nyau enda beruai, tama bilik aja meda TV. Mensia enda berandau kepenemu, berandau ngasu, berandau bumai, laban nyinuk meda TV aja. Sida ke biak nyau nemu bekeruke. Bekeruke ukai ga pengawa jai, tang selalu sida ke biak mansang iya kelalu ingar, datai ke anak mit enda ulih tinduk.

Kelimpah ari nya, nama guna letrik enti dipasang aba rumah panjai?

Letrik kena Ngiga Duit – primary production factor

Mayuh kitai Dayak udah kereja di nengeri lalu meda kilang endur kitai kereja nya tutup enti nadai letrik. Ukai bub api aja ke padam, tang mesin enda bepusin, komputa enda dipasang. Nya kebuah sida kebisi kilang sebana rugi enti letrik nya putus.
Aba jaku Inglis, letrik tu “primary production factor,” reti nya perengka kepemadu beguna aba kereja mengilang. Enti nadai letrik, kilang enda idup, nya reti iya.

Kelimpah ari letrik, kilang mesti bisi ai enggau jalai. Ai nya siti agi primary production factor. Jalai nya nyambung kilang asuh kilang bukai, nyambung kilang asuh pasar, asuh port asuh padang bilun.

Chunto Patut ditunda

Bediri ari nya, kitai Dayak patut ngambi chunto ari menua maju jalai kitai ngena letrik. Perening kitai mesti ngelimpas letrik dikena dirumah aja (domestic usage), endor kitai ngiga penyenang (convenience) enggau pengerami (entertainment). Giga kitai jalai endur kitai tau nguna letrik tu kena ngemaju ke pengidup kitai dirumah panjai. Guna letrik kena kitai bediri aba kaki diri empu, enda ngandar, enda ngarap ke bantu urang, enda milih kitai tu bisi sekula tau ke enda.

Siti endur kitai belajar nya meda endur kitai kereja diatu. Baka sida ke kereja machining, welding, nya pengawa ke ulih dipelajar kitai. Tu mega pengawa ke tau di bai kitai ke menua mega.

Kedua, peda peminta urang dimenua kitai. Enti rumah panjai bisi 3, 4 iti semak dia, lalu ke empat nya dipansa rumah jalai alun, peminta urang nya workshop kereta. Nuan muka kedai worshop, tentu nuan bisi bisnis di rumah panjai.

Kedua dua fakta (skills & demand) tu digabung lalu dikena ngaga pengidup meruan di menua pesisir. Enda ibuh nuan nganti kursus tau ke nganti urang madah.

Guna Letrik di Rumah Panjai

Ditu aku nyelepak ke penemu mimit. Tu mina anak penemu aku laban dijangka aku kitai mayuh agi penemu ke tau dikena.

1. Kraftanggan menua pesisir. Pekara pelu nya: Cutters (besai enggau mit), grinder (chunto; angle-grander) borer (baka drill), sander (orbiter & rotating), kompresor (giga ke mit rega RM400 ari menua China & semua accessories iya), enggau, enti chukup modal beli ke worktable. Laban kitai Dayak pandai ngaga meja endor kereja, kitai tau ngaga kediri, pasang enggau pengepit (g-clamp) ke kena.

Berapa rega: Enti Brand Bosch, rega mar, tang nuan tau ngiga kedua barang nya digaga menua China. Enti “heavy duty,” nyamai meli Bosch, dikena sari ari enda jai. Mashin gaga China enda tan motor. Udah angat deka jai terus.
Enda aku ulih meri semua rega. Baka Sander, bisi ke rega RM400 (Bosch), bisi ga rega RM90 (China). Drill, bisi rega RM280 (nitih ke watt), bisi ga rega RM90.

Nama utai ulih digaga? Kraftanggan buluh, kraftanggan kayu, bemban, sega, wee. Kunchi iya ukai urang madah ke nuan, tang nuan empu muka mata maya bejalai kin kia. Ngambi ke chunto, peda ni ulih gaga nuan?

Ulu duku, fly fishing rod, sarung duku, sarang insap ari buluh, kayu ngaru belakang, bingkai raga, uyut, bubu kena hiasan, tangui. Enti menua nuan dipansa jalai alun, semua barang barang tu tau di jual nuan. Gaga ke rumah mit tisi jalai, jual dia. Udah lama lama, mesti urang bisi nemu nuan ke bejual.

Di Malaya din, bansa urang Alsi bisi endur diagih keperintah ngaga sereta nyual barang handicraft tu. Endur nya enda jauh ari Simpang Genting Hinglands.

2. Workshop Kereta, basikal, motor sikal. Bansa Iban mayuh kereja aba bengkel kereta di Selangor. Mayuh kedai tayer di Puchong ngena bansa Iban laban enda ibuh ngiga permit enggau paspot. Sekeda kereja aba bengkel nyemeray kereta.
Ari nya tenoloji ngadu ke kereja mayuh udah diempu bansa Iban. Ngadu ke motor bakanya mega. Mayuh bala Iban udah pandai ngubah motor sida iya.

Nya alai enti Iban muka bengkel (workshop) kerita enggau motor di rumah panjai, pengawa nya tau nyadi enti rumah panjai nya dipansa kerita.

Basikal – nya enda ibuh disebut. Kitai tu ngeripil basikal maya agi sekula menya.

Nama perengka ke patut dikembuan? Siti rumah digaga ke bengkel. Sambung ke letrik. Udah nya bisi siti kompresor mit (rega RM400). Kereban kena muka injin kereta enggau tayer. Kereban ngetuk enggau kereban ngechat.

Rega: Ngaga bengkel ke manah buguna ke duit RM10,000 keatas. Mayuh bengkel baru dibuka enggau rega mimit laban kereban ke mudah aja dibeli Tang lama udah ngaga bengkel, kereban betambah. Enti nuan bejalai ke Felda Temerloh kin, bemngkel menua nyin endang bansa Melayu magang. Bengkel isi jalai lalu rumah sida iya semak dibelakang kedai.

3. Betukang kayu enggau ngaga barang perabut. Kitai Iban endang landik beguna ke jari. Enti ingat, menya ukir gaga Iban endang manah dipeda.

Enti kitai ngena pengelandik nya, kitai tau ngaga bangku, ngaga nyemari. Kitai tau betukang ngeripil perabut lama.

Udah dipasang letrik, kitai Iban tau ngaga kerusi, bangku, nyemari enggau parabut bukai ngena chara ukir. Iya ke diatu semua perabut ukir datai ari Indonesia. Peda di Jalan Satok enggau Pasar Batu 7 gaya perabut ukir urang, dijual enggau rega ke mar. Perabut Indonesia tu digaga ari kayu jati, dijual enggau rega RM10,000 siti set. Siti mija udah RM3,000.

Di Malaya, bansa Iban bekuli ngusuk peraut jati tu. Sida ngena mesin mit, kena ngalus ke mija. Uh nya, perabut di vanis. Kedua diengkah penutup kain, dihias enggau leka manik. Tu endar pengawa bansa kitai Dayak, kitai Iban.

Berapa Rega niri ke Bengkel Perabut? Nitih ke pemesai kedeka nuan. Enti udah bisi letrik, udah dipansa Jalai, pengawa tu tau di kereja di tengan laman. Enti bisi tanah pansa jalai, tu manah agi. Enti bengkel ya mit, RM10,000 udah chukup kena mula. Nyau kelama, urang udah nemu pengelandik nuan, tentu barang gaga nuan laku. Maya bisi untung, nuan tau ngeremai ke bisnis.

4. Bekebun Nupi Ikan enggau Jelu. Letrik disambung ke menua pesisir tau nulung kitai ngaga kebun ke menyana.

Bisi letrik nuan tau nyambung pum kena meresi ai pegung.
Bisi letrik nuan tau ngaga tangki ikan semak jalai raya lalu nyual ikan di tisi dia. Enti nadai pum, ikan deka mati.
Bisi letrik nuan tau ngaga sarang burung walit. Enti nadai letrik, nuan enda ulih masang speakers kena ngumbai urung tu. (Topik tu deka di tulis maya bukai).
Bisi letrik nuan empu tau diau semak kebun nuan. Bini anak nitih ke nuan ke kebun enda tusah.
Bisi letrik di kebun nuan enda ibuh pulai ke rumai panjai agi. Nuan bisi radio, tv lemai ari.

Model Di Taiwan: Di Taiwan, bisnis endang bemula ari rumah. Tu ngurang ke rega sewa, transport, kuli (laban bini, apai indai tau nulung), sereta management. Nuan empu bisi dia belama. Ari industri mit, sida di Taiwan ngerembai ke pengawa bisnis.
Diatu kitai meda insutri ke besai besai ari Taiwan, puncha sida iya endang ari rumah. Udah kaya sida iya mndah ke kilang asuh endur bukai.

Modal di Japan: Iya ke peda kitai Japan tu menua udah maju dalam industri. Tang keterubah iya mayuh industri tu digaga belakag rumah. Udah besai, industri dipindah ke endor lebih menyana.

Di Malaya, kompeni baka kichap chap aminah hasan, sida digaga ari belakag rumah suba, tang diatu udah besai bisi kilang kediri empu. Kompeni Goh Ban huat pen sama. Kompeni QL Resources mula ari rumah di kuala selangor. Ditu udah ditiki asuh papan saham.

Agi mayuh chunto tau disebut tang nyau kelalu panjai sara tu. Chunto tu enda nyadi enti nadai letrik.

Strateji kitai:

1. Anang ngarap enggau nganti. Enti enda jari, tulang enggau peluh diri empu, nuan enda patut ngarap ke jari urang nyurung nulung nuan. Ari nuan ke enda ngarap, dia nuan berusaha ngiga penemu kediri empu. Siko bala kuli enggau ake kereja nganu bala sida bukai: “Kitai tu sama rumah panjai, sama bisi mata, sama bisi jari, dini neda nemu? Enti enda nemu, belajar.” Nya pesan aku tentang “ngarap.” Enti enda nemu, belajar. Enti nadai puku, ngiga. Enti nganti utai datai kediri empu, nuan salah penemu.

Pia mega nuan enda nganti. Nganti sapa? Arap ke bala ke macha sara tu enda nganti tang gaga perambu ari diatu. Pikir enggau panjai. Enti nuan minta penemu, tanya urang bukai, tang pengawa enda nyadi enti nganti, nganti, nganti.

2. Buka Mata: Mata bisi dua, jari bisi dua, undung, pending bisi dua magang. Untak bisi kena mikir kediri. Begulai enggau urang di Malaya peda endur nuan kereja, nama utai ke tau nulung, tau ngidup ke nuan, perati ke dulu. Ku sempama Inglis: “Enti sari nuan nadai utai dipelajar ari urang bukai, nuan udah ngelepas peluang manah. Ke agi, anang ngelepas peluang belajar ari urang.”

Pelajar enda ambis di bangku sekula. Anembiak enggau aku kereja endang di ansak aku belajar ngechat, belajar driva, belajar nyembur chat, netak ngena mesin, ngetam kayu. Enti enda nemu, padah, laban bisi urang ngajar. Siko anembiak ngenjumbung ke diri madah nemu. Mimit agi kena jari iya laban mesin maya netak plywood.

Peda kereban kena urang. Tanya rega kereban nya.

3. Simpan Duit: Nadai jalai bukai enti deka ngaga begkel, ngaga bisnis di menua pesisir. Enti nadai modal anang ngeluba ke diri deka ngaga bisnis. Sapa ka meri nuan duit? Sekali aku betemu enggau siku mekanik Iban, minta tulung RM10,000 laban ka muka bengkel. “Dah, ni gratuiti nuan deh?” ko aku nanya, laban iya baru pansut ari army. Duit udah ambis di kena, bah sapa agi deka meri duit?

Kena aku muka bisnis muka kedai enggau supply barang ramu aku di Malaya, aku ngena RM120,000. Nya ukai duit beri urang, tang duit simpan diri empu. Enti kitai bisi tuju, kitai mesti berani nyimpan sereta engkah semua duit nya kia.

Pengujung jaku:

Aba column tiap minggu di Utusan Borneo aku meri lalau tentang bisnis. Tiap kali aku nulis, aku minta urang nulis enti bisi utai ditanya (email: seliongpersonfin@gmail.com). Nadai mayuh urang nanya meri reti utai ditulis nya kelalu mudah, semua udah temu, tau ke mayuh kitai Iban nadai runding ngaga bisnis.

Ditu aku ngerandau bisnis aba rumah panjai, aba menua pesisir. Konsep iya lebih kurang sama. Tang enti sema bisi betingkah, tuju iya sama: Kitai Iban Patut Bediri Aba Kaki Diri Empu. Laban udah disambung letrik, guna peluang bisnis, peluang bumai, peluang betupi di menua pesisir kena ngidup ke diri ngambi kkitai sama sama maju. Ari kitai maju, kitai enda bepanggai aba urang agi.

Terima kasih.

[KabanL]

Ok, bakani ka ngetanke kuli kerja? How to motivate Dayaks to work for Dayaks and not seeking bos bansa bukai? Pls give your practical tips.